Rang bhar do…

Meri jaan tujhpe sadke, ehsaan itna kar do…
Meri zindagi me apni chaahat ka rang bhar do…

Advertisements

“Jash-e-Ghalib…” – Sahir Ludhianvi

Ikkis baras guzre aazadi-e-kaamil ko

Tab ja ke kahin hum ko ‘ghaalib’ ka khayal aaya

Turbat hai kahan us ki maskan tha kahan us ka

Ab apne sukhan-parwar zehnon mein sawal aaya

Sau sal se jo turbat chadar ko tarasti thi

Ab us pe aqidat ke phulon ki numaish hai

Urdu ke talluq se kuchh bhed nahin khulta

Ye jashn ye hangama khidmat hai ki sazish hai

Jin shahron mein gunji thi ghaalib ki nawa barson

Un shahron mein ab urdu benam-o-nishan Thahri

Aazadi-e-kaamil ka elan hua jis din

Matub zaban Thahri ghaddar zaban Thahri

Jis ahd-e-siyasat ne ye zinda zaban kuchli

Us ahd-e-siyasat ko marhum ka gham kyun hai

‘Ghaalib’ jise kahte hain urdu hi ka shair tha

Urdu pe sitam Dha kar ‘ghaalib’ pe karam kyun hai

Ye jashn ye hangame dilchasp khilaune hain

Kuchh logon ki koshish hai kuchh log bahal jaen

Jo wada-e-farda par ab Tal nahin sakte hain

Mumkin hai ki kuchh arsa is jashn pe Tal jaen

Ye jashn mubarak ho par ye bhi sadaqat hai

Hum log haqiqat ke ehsas se aari hain

‘Gandhi’ ho ki ‘ghaalib’ ho insaf ki nazron mein

Hum donon ke qatil hain donon ke pujari hain

 

“Aawaz-E-Adam…”  

 

Dabegi kab talak aawaz-e-adam hum bhi dekhenge

Rukenge kab talak jazbaat-e-barham hum bhi dekhenge

Chalo yunhi sahi ye jaur-e-paiham hum bhi dekhenge

Dar-e-zindan se dekhen ya uruj-e-dar se dekhen

Tumhein ruswa sar-e-bazar-e-alam hum bhi dekhenge

Zara dam lo maal-e-shaukat-e-jam hum bhi dekhenge

Ye zoam-e-quwwat-e-faulad-o-ahan dekh lo tum bhi

Ba-faiz-e-jazba-e-iman-e-mohkam hum bhi dekhenge

Jabin-e-kaj-kulahi khak par kham hum bhi dekhenge

Mukafat-e-amal tarikh-e-insan ki riwayat hai

Karoge kab talak nawak faraham hum bhi dekhenge

Kahan tak hai tumhaare zulm mein dam hum bhi dekhenge

Ye hangam-e-wida-e-shab hai ai zulmat ke farzando

Sahar ke dosh par gulnar parcham hum bhi dekhenge

Tumhein bhi dekhna hoga ye aalam hum bhi dekhenge

“Lamha-e-Ghanimat…”  

 

Muskura ai zamin tira-o-tar

Sar utha ai dabi hui makhluq

Dekh wo maghribi ufuq ke qarib

Aandhiyan pech-o-tab khane lagin

Aur purane qimar-khane mein

Kohna shatir baham ulajhne lage

Koi teri taraf nahin nigran

Ye giran-bar sard zanjiren

Zang-khurda hain aahani hi sahi

Aaj mauqa hai tut sakti hain

Fursat-e-yak-nafas ghanimat jaan

Sar utha ai dabi hui makhluq

 

“Magar Zulm ke Khilaaf…”

Hum amn chahte hain magar zulm ke khilaf

Gar jang lazmi hai to phir jang hi sahi

Zalim ko jo na roke wo shamil hai zulm mein

Qatil ko jo na Toke wo qatil ke sath hai

Hum sar-ba-kaf uthe hain ki haq fatah-yab ho

Kah do use jo lashkar-e-baatil ke sath hai

Is Dhang par hai zor to ye Dhang hi sahi

Zalim ki koi zat na mazhab na koi qaum

Zalim ke lab pe zikr bhi in ka gunah hai

Phalti nahin hai shakh-e-sitam is zamin par

Tarikh jaanti hai zamana gawah hai

Kuchh kor-baatinon ki nazar tang hi sahi

Ye zar ki jang hai na zaminon ki jang hai

Ye jang hai baqa ke usulon ke waste

Jo khun hum ne nazr diya hai zamin ko

Wo khun hai gulab ke phulon ke waste

Phutegi subh-e-amn lahu-rang hi sahi