“Intezar…”

Chand maddham hai aasman chup hai

Nind ki god mein jahan chup hai

Dur wadi mein dudhiya baadal

Jhuk ke parbat ko pyar karte hain

Dil mein nakaam hasraten le kar

Hum tera intizar karte hain

In bahaaron ke sae mein aa ja

Phir mohabbat jawan rahe na rahe

Zindagi tere na-muradon par

Kal talak mehrban rahe na rahe!

Roz ki tarah aaj bhi tare

Subh ki gard mein na kho jaen

Aa tere gham mein jagti aanhken

Kam se kam ek raat so jaen

Chand maddham hai aasman chup hai

Nind ki god mein jahan chup hai

“Jaagir…”  

 

Phir usi wadi-e-shadab mein laut aaya hun

Jis mein pinhan mere khwabon ki tarab-gahen hain

Mere ahbab ke saman-e-tayyush ke liye

Shokh sine hain jawan jism hasin banhen hain

Sabz kheton mein ye dubki hui doshizaen

In ki shiryanon mein kis kis ka lahu jari hai

Kis mein jurat hai ki is raaz ki tashhir kare

Sab ke lab par meri haibat ka fusun tari hai

Hae wo garm o dil-awez ubalte sine

Jin se hum satwat-e-aba ka sila lete hain

Jaane un marmarin jismon ko ye mariyal dahqan

Kaise in terah gharondon mein janam dete hain

Ye lahakte hue paude ye damakte hue khet

Pahle ajdad ki jagir the ab mere hain

Ye chara-gah ye rewad ye maweshi ye kisan

Sab ke sab mere hain sab mere hain sab mere hain

In ki mehnat bhi meri hasil-e-mehnat bhi mera

In ke bazu bhi mere quwwat-e-bazu bhi meri

Main khudawand hun us wusat-e-be-payan ka

Mauj-e-ariz bhi meri nikhat-e-gesu bhi meri

Main un ajdad ka beta hun jinhon ne paiham

Ajnabi qaum ke sae ki himayat ki hai

Uzr ki saat-e-napak se le kar ab tak

Har kade waqt mein sarkar ki khidmat ki hai

Khak par rengne wale ye fasurda Dhanche

In ki nazren kabhi talwar bani hain na banin

In ki ghairat pe har ek hath jhapat sakta hai

In ke abru ki kamanen na tani hain na tanin

Hae ye sham ye jharne ye shafaq ki lali

Main in aasuda fazaon mein zara jhum na lun

Wo dabe panw idhar kaun chali jati hai

Badh ke us shokh ke tarshe hue lab chum na lun

“Jaagir…”  

Phir usi wadi-e-shadab mein laut aaya hun

Jis mein pinhan mere khwabon ki tarab-gahen hain

Mere ahbab ke saman-e-tayyush ke liye

Shokh sine hain jawan jism hasin banhen hain

Sabz kheton mein ye dubki hui doshizaen

In ki shiryanon mein kis kis ka lahu jari hai

Kis mein jurat hai ki is raaz ki tashhir kare

Sab ke lab par meri haibat ka fusun tari hai

Hae wo garm o dil-awez ubalte sine

Jin se hum satwat-e-aba ka sila lete hain

Jaane un marmarin jismon ko ye mariyal dahqan

Kaise in terah gharondon mein janam dete hain

Ye lahakte hue paude ye damakte hue khet

Pahle ajdad ki jagir the ab mere hain

Ye chara-gah ye rewad ye maweshi ye kisan

Sab ke sab mere hain sab mere hain sab mere hain

In ki mehnat bhi meri hasil-e-mehnat bhi mera

In ke bazu bhi mere quwwat-e-bazu bhi meri

Main khudawand hun us wusat-e-be-payan ka

Mauj-e-ariz bhi meri nikhat-e-gesu bhi meri

Main un ajdad ka beta hun jinhon ne paiham

Ajnabi qaum ke sae ki himayat ki hai

Uzr ki saat-e-napak se le kar ab tak

Har kade waqt mein sarkar ki khidmat ki hai

Khak par rengne wale ye fasurda Dhanche

In ki nazren kabhi talwar bani hain na banin

In ki ghairat pe har ek hath jhapat sakta hai

In ke abru ki kamanen na tani hain na tanin

Hae ye sham ye jharne ye shafaq ki lali

Main in aasuda fazaon mein zara jhum na lun

Wo dabe panw idhar kaun chali jati hai

Badh ke us shokh ke tarshe hue lab chum na lun

“Ek Waqia…”

Andhyari raat ke aangan mein ye subh ke qadmon ki aahat

Ye bhigi bhigi sard hawa ye halki halki dhundhlahat

Gadi mein hun tanha mahw-e-safar aur nind nahin hai aaankhon mein

Bhule-bisre armanon ke khwabon ki zamin hai aaankhon mein

Agle din hath hilate hain pichhli piten yaad aati hain

Gum-gashta khushiyan aaankhon mein aansu ban kar lahraati hain

Sine ke viran goshon mein ek Tis si karwat leti hai

Nakaam umangen roti hain ummid sahaare deti hai

Wo rahen zehn mein ghumti hain jin rahon se aaj aaya hun

Kitni ummid se pahuncha tha kitni mayusi laya hun

“Fankar…”

Main ne jo git tere pyar ki khatir likkhe

Aaj un giton ko bazar mein le aaya hun

Aaj dukkan pe nilam uthega un ka

Tu ne jin giton pe rakhi thi mohabbat ki asas

Aaj chandi ke taraazu mein tulegi har chiz

Mere afkar meri shairi mera ehsas

Jo teri zat se mansub the un giton ko

Muflisi jins banane pe utar aai hai

Bhuk tere rukh-e-rangin ke fasanon ke ewaz

Chand ashiya-e-zarurat ki tamannai hai

Dekh is arsa-e-gah-e-mehnat-o-sarmaya mein

Mere naghme bhi mere pas nahin rah sakte

Tere jalwe kisi zardar ki miras sahi

Tere khake bhi mere pas nahin rah sakte

Aaj un giton ko bazar mein le aaya hun

Main ne jo git tere pyar ki khatir likkhe…