Ummeed waqt ka…

Ummeed waqt ka sabse bada sahara hai…
Gar hausala hai to har mauj mein kinaara hai…

Advertisements

  “Khoobsurat Mod…”

Chalo ek bar phir se ajnabi ban jaen hum donon

Na main tum se koi ummid rakhun dil-nawazi ki

Na tum meri taraf dekho ghalat-andaz nazron se

Na mere dil ki dhadkan ladkhadae meri baaton se

Na zahir ho tumhaari kashmakash ka raaz nazron se

Tumhein bhi koi uljhan rokti hai pesh-qadmi se

Mujhe bhi log kahte hain ki ye jalwe parae hain

Mere hamrah bhi ruswaiyan hain mere mazi ki

Tumhaare sath bhi guzri hui raaton ke sae hain

Taaruf rog ho jae to us ka bhulna behtar

Talluq bojh ban jae to us ko todna achchha

Wo afsana jise anjam tak lana na ho mumkin

Use ek khub-surat mod de kar chhodna achchha

Chalo ek bar phir se ajnabi ban jaen hum donon